Moderatores

Praeses

Aloisia Aguilar

Est magistra utriusque linguae in lyceo “El Puig” prope Valentiam sito. Defendit anno MMXV thesin doctoralem de Varrone in Vniversitate Studiorum Valentina, in qua litteras Latinas profitetur ab anno MMXIX. Maxime delectatur rationibus docendi linguae Latinae quas in Academia Vivarii Novi nosse potuit; quocirca quinquies accita est in CAELVM ubi magistros informavit. Huc adde haud paucos cursus Latinitatis multis in oppidis ab ea traditos esse.

Alter a praeside

Stephanus Bérchez

Studia Philologiae Classicae anno MM Valentiae perfecit et Barcinoni thesin doctoralem de Ovidii relegatione defendit. Litteras Romanas libentissime pervestigat et cum amicis de rebus humanis, ut aiunt, divinisque sermocinatur. Certaminibus publicis superatis, in lyceo Mislatae prope Valentiam suos discipulos Cultum Classicum et Linguam Latinam docet necnon munere magistri fungitur in Vniversitate Studiorum Valentina ab anno MMXVIII.

A secretis

Georgius Tárrega

Litteras latinas profitetur in Vniversitate Studiorum Massachusettiana, Bostoniae sita in Civitatibus Americae Foederatis. Docuit viginti tres annos in lyceis Valentinis atque futuros magistros in Studiorum Valentina Vniversitate arte docendi suscepit informandos. Thesim doctoralem de philologia latina anno MMV defendit aliasque porro symbolas et opuscula de litteris latinis in lucem edidit. Munere magistri functus est septies in CAELO atque anno MMXV cooptatus est in Academiam Latinitati Fovendae. Nostro Collegio praefuit ab anno MMXVI ad ann. MMXX.

Arcaria

Eirene Fernández

Studiis Vniversitariis de linguis pervestigandis Valentiae perfectis, voluit altius informari in Vniversitate Studiis e longinquo Provehendis (vulgo UNED). Ibi studiis Antiquitatis operam dedit atque praemio honorata est a Societate Studiorum Classicorum (SEEC). Publico certamine ann. MMXIX superato, linguam Latinam Cultumque antiquorum in lyceo Edetano docet. Eius omnes vias interest perscrutari et ad linguam Latinam colendam et ad scriptores Romanos assidua lectione evolvendos.

Consiliarius

Radulfus Navarro

Radulfus Navarro publico linguae Latinae Graecaeque magistri munere in lyceo Hispalensi fungitur. Anno MMXVIII cum in academia de Philologia Latina sermone Latino disseruisset, est in doctorum numerum cooptatus. Plautus, Cicero, Ovidius, Augustinus, Ioannis Audoenus ei sunt in deliciis. Scripta quoque de docendi ratione deque ipsis auctoribus interdum foras dat.

Consiliaria

Alba Pozuelo

Studiis anno MMXVII confectis, Alba cursum litterarum Antiquarum necnon cursum lyceorum magistris informandis perfecit dum in Universitate Studiorum Malacitana linguam et litteras Latinas biennium docet. A prima iuventute haud paucis cursibus de lingua Latina et Graeca viva ratione docenda interfuit, in quibus lustrationes suscepit mystagoga nonnullis in Museis, itemque una cum condiscipulis Malacitanis Circulum Latinum nomine ‘Mane Latinum Malacitanum’ condidit. Nunc munere magistrae suffectae in Baetica regione in Hispania fungitur et thesim doctoralem scribit de astrologia Mediae, quae dicitur, Aetatis. Est Albae in deliciis Ovidii opera legere.

Consiliarius

Eugenius Prell

In Germania (Siegen) natus, studia perfecit Philologiae Classicae Valentiae anno MMXVII. Cursui c.n. CAELVM ter interfuit, in cuius lustrationibus et mystagogi partes libenter suscepit. Linguam latinam Graecamque docet ab anno MMXVIII in lyceis Valentinis. Magno cum gaudio tragoedias et comoedias legit.

Nomen da Collegio Latinitatis!

Si sodalis nostri Collegii fieri volueris, suademus beneficia legas, schedam nominis dandi impleas in reti eamque mittas quamprimum.